وط صوتك حبيبي

وط صوتك حبيبي .. السماء تسمعك !
ليه تفضح زعلـنا البارحة لـ المطر .

ماتخاف إن لمحك تصيح .. جــاء يتبعك
وتغرق هالمدينة .. من سبايب قهر

صب كل الحكي بإذني تراني معك
وإن سكرت .. إعرف إن عيني تحسبك خمر

ولا تقول الهبوب اللي مسح مدمعك
والله أن أربط يديه .. بـيدين الشجر ..

ما يمسّح دموعك .. غير من يمنعك
ومن يبي يمنعك غيري .. مدامك سحر .. !

خلني بين قلبك وبين نحف أضلعك
يمكن إن شافني قلبك .. يدور عذر .

كنك الرجم .. وإيديني تبي تطلعك
وآتمايل وأصير .. معلق ٍ في حجـر

لا وصلت لغلاك .. ولا قدرت أجمعك
ولا بقى بين هالثنتين .. غير الصبر

يا كبر قدرك بقلبي .. ويا مسرعك !
لا تمشيت مع دمي .. وأشوفك تمر

يوم كنت تحكي لي .. كنت أبوس إصبعك ..
ويوم طال الكلام .. شوي قلت : أنتظـر

لا رقيت لخدودك .. من يبي يـنفعـك !!
ما يرد الظلام .. الا طـلـوع الفـجـر

وط صوتك حبيبي .. لو أنا ماأسمعك
مابي أحد ٍ يشاركني .. بصوت القمر