لي ثلاث ايام ماجاني كفر

السلام عليكم ورحمة الله وبركاته

أحمد الجريفاني شاعر كبير له مئات القصائد المنشورة في عدد
من المنتديات ، وشعره متنوع بين الحكمة والغزل والإخوانيات وغيرها ..

لكن وجدت له قصيدة فيها مع الحكمة ( شيئا من المداعبة والهزل
الجميل )

وهو قد بناها على مطلع القصيدة المغنّاة :

لي ثلاث ايم ماجاني خبر
............... واعنا قلب الولع واعناه

اترككم مع القصيدة ..


لي ثلاث ايام مـا جانـي كفـر
واعنا قلـب المبنشـر واعنـاه
واقفـن مابيـن رفحـا والحفـر
بنشر الحنتور واستملس سمـاه
طحت في خطن جلد كلـه جفـر
ارض جردا ما نجا حيـن وطـاه
ارض صبخا ما بها ريحة شجـر
تستحي تسكن بها حتى السفـاه
السبير انشق مـن مـدة شهـر
وضاعت الرقعه اكيد احدن خذاه
وين مفتاح العجـل مالـه اثـر
من سرق عفريتتي هذا عصـاه
يوم حل الليل والنـور انحسـر
ابتدا ذيبـان يستعـرض عـواه
دق لي سرحان ناقـوس الخطـر
كان هو جيعان خلانـي عشـاه
بي جلادة بدو لو ربعـي حضـر
ما يخوفني عواء ذيـب الفـلاه
بتت وسط الجيب والدنيـا مطـر
جايعن بـردان يـا الله النجـاه
ليلتن خرمـس تمنيـت القمـر
لجل اشوف الذيب وشو منتهـاه
ليلتن شلتى والامعط مـا شعـر
لا قعد بارضـه ولا ربـي هـداه
المطـر والبـرد لقاهـن ظهـر
ناوين له واحـدن ربـي بـلاه
عنده انه با العـواء يرمـي درر
وشهي الدبره لمن حظـه رمـاه
قمت ابسحب فروتي طاحت حدر
فوقهـا مطارتـي منكـب مـاه
ليلتن من طولها صـارت عمـر
ما تفيدن قولتي ويـش السـواه
صرت اهيجن لين ما شق الفجر
منحشر هلكـان وسلاحـي قنـاه
احمد الله يا عرب ربـي ستـر
النهار ارحم من الليـل وشقـاه
يوم صار ضحي مديـت النظـر
المطر كل الـذي حولـي مـلاه
صارت الصبخا من الديمه بحـر
من نوى يمشي تعثر في خطـاه
سرت مشمل يا عسى حين يمـر
عشر كيلو يمكن اكثـر باتجـاه
مومنن يا خوك في حكـم القـدر
واعرف الله ما يخيب من رجـاه
عند اذاني تقل به شـي يهـدر
استدرت وقمت اشاور با العبـاه
احمد الله ساق لي راعي شفـر
اجودي با الحيل ركبنـي معـاه
موتره مضبـوط لعنبـو الفقـر
ودي ادري بس من وين اشتراه
قلت هذا جمس قال اسمه همـر
شد في دترويت ماهو في مـراه
الاكيد انـه مصنـع مـن حجـر
كان هو مية سرنـدل مـا كفـاه
ضاع جوعي تقل شبعانن هبـر
صرت امدح فيه واشكر بخويـاه
قال وين انت امتعطل يـا بشـر
قلت هذي جررتي سيروا حـذاه
جيت للماخوذ يـا وجـه القشـر
قـال هـذا موتـرك رديـت اه
المعاون قام فـي لمـح البصـر
حربث وهمهم اظـن انـه قـراه
مادري وشلون قالوا بـا الكفـر
ادخلوا بـه سيـم قالـوا ذا دواه
اسحبوا جيبي شوي عن الحفـر
قال لي حرك قبل يدمـس مسـاه
قلت عشتو دربكـم كلـه خضـر
جاوب اتبعني ورحت اسحب وراه
النصيحـه للـذي ينـوي سفـر
التهقوي علـة القلـب وعمـاه
شل معك قربه وشل خيشة تمـر
وشل معك عده من الفه لين يـاه
وشل معك شوزن وكبريت وسمر
مخطين من راح من دون خوياه
اعتبر هذي نصيحه مـش امـر
مثلكم يفهـم وقصـدي ماخفـاه
لا تضيع التجربه عنـدك هـدر
الذكي منهوا يترجـم مـا قـراه

للشاعر / أحمد الجريفاني