يا راكبٍ من عندنا فوق ضبّـاح

يا راكبٍ من عندنا فوق ضبّـاح
يجفل الا ما اومت عليه الجنايـب
جنايبـه مثـل الغرابيـن طفّـاح
حرٍ هميمٍ مـن خيـار الركايـب
منصاك منهـو للمواحيـل ذبّـاح
ويفرح ليا ماشاف عوص النجايب
مايذبح الا من المواحيـل قـرّاح
ويقلط عليها لو ثمنهـا غلايـب
غمرٍ ثمان سنين من ديرتـه راح
ومن راح صوب الشام بيتم غايب
مذوقهم بيضٍ معـا حـب تفـاح
ويسهّله بالببس عذب الشرايـب
يكتب بخط الحبر في زين الالواح
واللي تعلـم فالقلـم حِـط نايـب
فيابو سعيد السد منه العزا بـاح
واللي مهيضني علومك عجايـب
والعين مني دمعهـا فالغبـا فـاح
ولاجيت بارقد شب فيها شبايـب
تقول بع البل ومن الهـم ترتـاح
وخلك تحضرا جوف ربعٍ قرايـب
فمن بيّع ابله وانثنى فالبلد طـاح
هذاك جايه مـن وليّـه عقايـب
خله ليا منه انتحى البرق هم لاح
نبرا لطرعات البكـار الحلايـب
عربٍ الا ما وكـدت زول ميّـاح
منها حنايا الحوض راحت حطايب
لاشفتها في مرتـعٍ فيـه طفّـاح
يزداد حالي ياعطيـب الضرايـب
فالبل هواها فالمناعيـر مصـلاح
يرعا بها الاقفار ماهـوب هايـب
ترى الهوى سوقة معاشير ولقاح
في عثعثٍ ماجاه كـون الهبايـب
قلبي يحب البل ولانيـب مـزّاح
جرْد الرقاب مـذورات الربايـب
احب قمراً تحتها الديـد ميضـاح
وصفراً تشوق العين فيها جنايب
كنها هنوفٍ تلعب الغـي بشفـاح
تهَبّـد الغـران والرجـل غايـب
لانيب لاشـاوي ولانيـب فـلاّح
ورزقي على ربٍ ينشي السحايب