الشاعر عبد الرحمن ناصر الحشكلي الجهني

بسم الله الرحمن الرحيم



اليو جايب لكم بعض قصائد الشاعر عبد الرحمن ناصر الحشكلي الجهني


قصيدة البارحه


البارحة بالليل حالي صعيبي ** ليلي قضيتة بين هم ومعاناه
سهران كني ذيب يقنب قنيبي ** من زود جوعه يزعج الليل بعواه
ياليت لجروح المعنا طبيبي ** لاشك جرحي بالهوا يصعب إدواه
جرحن بقلبي هقوتي ما يطيبي ** وخاب الرجاء من كل دكتور داواه
جرح المحبه وسط قلبي عطيبي ** ولبين جرحه جرح مابه مناجاه
على اللذي بين الخلايق غريبي ** ولا شفت بين الناس مثله وحلياه
اللي عليه أنوح ونحب نحيبي ** واكثر ونيني ولحق الـ آه بالـ آه
علمي به أقفى وقت المغيبي ** قفاء وهو يشر وداعاً بيمناه
واليوم قلبي من فراقه صويبي ** والوقت مدري وش يكن إبخفاياه
مدري لنا ميعاد وقتٍ قريبي **ولا يحول الموت من دون لقياه
في وسط عيني صورته ماتغيبي ** وليا وصفته كيف أعدد مزاياه
ريمٍ جفول وفيه طبعن مريبي ** طبع الغزال اللي مع الصيد مرعاه
في عينه اليمنى رماحٍ تصيبي ** وبعينه اليسرى قصايد مغناه
ورموشها صفين جيش الصليبي ** مافيه واحد زل عن ذاك بخطاه
وفي شعرها لون الشفق والمغيبي ** ولا كما ليلٍ ظلامه تغشاه
وخدود بيضا مثل لون الحليبي ** وشفاه جمر والبرد في ثناياه
كيف البرد ما ذاب وسط اللهيبي ** ياعونة الله كلهن في محياه
طول وقد ونهد شكله عجيبي ** والبطن ظامر والردايف مملاه
وليا مشت مشي القطاء في شعيبي ** يادوب تسمع مشيته لدرج إخطاه
مافيه شيٍ في جسدها يعيبي ** حتى يديها من غـــنــــجها محناه
كل النساء منها تغار او تهيبي ** حتى خواته قلدنه بممشاه
ودي بشوفه مير ماهو قريبي ** بيني وبينه يتعب اللي معناه
بالديره اللي جعلها لسحيبي ** غر المزون اللي من الغيث منشاه
بأمر الولي تسقى دار الحبيبي ** وتخضر أرضه لجل ينعم بماطاه
ودعي له اللي فوق خلقه رقيبي ** يستر عليه من الليالي ويحماه
ون كان مالي في مشافه نصيبي ** هذا وعد مني الى يوم لقياه
منساه والله لين وقت المشيبي ** وصير عودٍ فوق مركوع ممشاه
لكن عسى يوم المواصل قريبي ** وشوف خلي وتهنا بلقيـــــــــــــاه
*********************************************


قصيدة يابوي


ياابوي دمعي حايرن داخل العين!! لاوالله الاطاح حتى بكاني!!
دمعن حبسته داخل عيوني سنين!! واليوم ماله في عيوني مكاني!!
يرسم على خدي لعمري عناوين!! قصه بطولتها يعيشه زماني!!
وأناالضحيه حسب ما بالقوانين!! المرء يكرم بالزمن أويهاني!!
وحداثها دارت عن الفقر والدين!! تحكي حقيقه مؤلمه في كياني!!
*******************************************


قـــصــيـدة عــاشقــــة الـــورد


علـــى ذكرى دروب العشق والعشاق والخلان!!ذكرت وهلت عيوني غزير الدمع واغرقها!!
ذكرت اللي مضى ليه وباللي صار واللي كان!!ذكرت سنينن عشناها وفي شعري موثقها!!
ذكرت اللي وفت ليه وساقت غالي ألاثمان!!هذيك اللي بنت مسكن لها في قلب عاشقها!!
هذيك أغلى من الدانات وألألماس والمرجان!!هذيك اطهر من الغيمه ليا من لااح بارقها!!
حلاياها بنات الحور ماهي من صوف انسان!!ملاكن طاغيه بالحسن ياسبحان خالقها!!
هذيك اللي بروعتها وسحر الون بالفستاااان!! تعانق ليلها مدري نسيم اليل عانقها!!
عطاهالله رجاحت عقل ماهو باأكثر النسوان!!كأن الله عن باقي بنات الكون فارقها!!
حشيمه في ملابسها حشا ماتلبس العريان!! فريده في وصايفها ولابه من يطابقها!!
جميله مترفه عاشت بحظن الورد والبستان!!تحب الورد وتشمه ألين النوم يسرقها!!
تميل أن هبت النسمه تثنا تقل عود البان!!تمايل ميلة الاغصان يوم الريح يصفقها!!
جسدها والردوف الي تراقص رقصت الطربان!!وصدرن زاد في حجمه واحس أنه مظايقها!!
ولا قامت بمشيتها تمايل ميلة ألاغصان!! ولامن ساقت الخطوه كأن الأرض تعشقها!!
وينبت في مواطيها ورود الفل والريحان!!تسوق الرجل بالممشا وريح العطر يسبقها!!
تحب ألعطف والرقه تحب اللين والتحنان!!تحب اليل وهدوه وشمسن طال مشرقها!!
تجيني ترسم البسمه وتخفي عني ألاحزان!!تقول احلامها ليه وقول الله يحققها!!
أنا وشلون ابنساها واعيش فراقها ولهان!!مدام أن الخواتم تعشق ايديها ولاتبغى تفارقها!!
لكن اليوم من دوني ومن دونه سفر وأوطان!!وناسن دونها صفت ورزت لي بيارقها!!
واناسافرت والرحله مع الغربه بلا عنوان!!ولي يمكن ثلاث اشهور ياربي مفارقها!!
وهي تشتاق والاشواق ماتاوي على الخلان!!رقيقه في مشاعرها واخاف الشوق يحرقها!!
وأنا راضي بحكم الله مالي بالقدر سلطان!!لكن باقول يا ربي توفقني وياربي توفقها!!
************************************************** **


قصيدة مرثيه مسعد الحشكلي


ياهاجسي عند العلوم الوكيده !!يكفي كلام اللسان عن مية اللسان
والشاعر أن ماقال قولن يفيده!!ليه ايتعنا بالقصايد واللحان
بسم الله الرحمن والعلم سيده!!واعوذ في مولاي من كل شيطان
وابدا بذكر اللي خلقنا عبيده!!جل جلاله واعتلا عالي الشان
اللي عباده في بلاده شهيده!!سبحان من تسجد له الأنس والجان
والبارحه يوم العيون الرقيده!!نامت وأنا من مادها القلب سهران
البارحه وجروح قلبي عديده!!ماني بلا طيب ولاني بمرضان
البارحه وضلوع قلبي وقيده!!شبت بقلبي نار عربه ودخان
ليت الحزن رجال واقبل ايده!!وقول له مشكور يكفيني احزان
ايوالله ابكي يالعيون الزهيده!!هلي دموعك وبل وسمي وهتان
ابكي على اللي في رحيله فقيده!!رجلن رحل تبكي على موته أوطان
تبكي عليه اهل العقول الرشيده!!وتبكي على موته قبايل وشيخان
اقسم بأيات الله انه فقيده!!وانه من اهل العرف وطول الايمان
من روس قومن بالملاقا عنيده!!قومن خلقها الله والشانها شان
تاريخهم حتى الدهر مايبيده!!يبقى ثبوته حي لوكان ماكان
مرحوم يلي مامشى بالنقيده!!واسمه يشرف ربعه بكل ميدان
صيته وصل كل الديار البعيده!!وبكل ديره سولفت فيه عربان
ربي عطاه من الصفات الحميده!!مالا عطا غيره ولااقول حقران
هذا كلامي والخلايق شهيده!!وانشد ويعطونك من العلم برهان
يكفي بأن اللي ترك في رصيده!!مالاا يعدد او يقدر بالأثمان
يكفي بأن الجود مسعد عضيده!!ويكفي بأن اللي مخاويه الاحسان
مده من الجزلات لامدت ايده!!ماكنها الا مدت الخير سلطان
والله لوينطق تراب الجديده!!اللي شهد فعله على مر الأزمان
غير ايتغنا به بجمله مفيده!!الطيب مسعد بس في صورة أنسان
عساك للفردوس ياخو سعيده!!مسكانك الجنه ولذنب غفران
وجعل السحاب اللي ترازم رعيده!!يمطر على قبره من الغيث هتان
صرحن بناه اليوم عامر مشيده!!ولا مات من خلف رجاجيل شجعان
ارداهم اللي بالمواقف وليده!!لركا يشيل الحمل من فوق الامتان
************************************************** **

قصيدة ياصاحبي



ياصاحبي كان شفت النفس منظامه@@جلستك وسط البلد ماهي ضروريه
الوقت ماهو بكيفك تمشي ايامه@@وانته تعرف الزمن مافيه مأويه
الهم يجعل حياتك وسط دوامه@@مما يؤدي لحب الأنطوائيه
وتصير هيكل ملبس ثوب وعمامه@@ويمكن يسمونك أهل الحي نفسيه
ولاتتبع اللوم واجد ناس لوامه@@مالك ومال المخاليق الأنانيه
يعني هروج القفا والكذب واحكامه@@صارت بهذ الزمن حاجه بديهيه
اليوم كلن يحط الزيف هندامه@@ حتى البناخي يضحي في بناخيه
ان كان تبغى تعيش وترفع الهامه@@خل القناعه معك حاجه اساسيه
وان جاك طاري وخلق الله نوامه@@يعني تهيضت لليل او مساريه
اركب على اللي يفوق الفين بارقامه@@تصميمه ابداع في فكره خرافيه
من طوكيو للجزيره برمج انظامه@@ربع وخليجي ولوحاته سعوديه
مايركبه صنف يابابه ويامامه@@مايركبه غير من يبعد حراويه
فلل من اقرب محطه واربط حزامه@@والوضع مزبوط والنيه شماليه
تبغى ديار الشفا يم ابو مدحامه@@من فوق مرجوم والديره خلاويه
ماداج به من لبس له جنز وبجامه@@ماجوه غير الاواليد الشقرديه
وان جيت وعله تشوف طيور حواامه@@من فوق سرا لينك جيت عصريه
وان شفت قلبك بعدها خفت اسقامه@@ترتاح الاعصاب وتذب الهجينيه
ياصاحبي واجد اللي ضاع بحلامه@@ونهايته ماكسب هاذي ولا ذيه
ان كان تبغى تعيش وترفع الهامه@@خل القناعه معك حاجه اساسيه






أن شاء الله تعجبكم