للشاعر خالد مدعث الدوسري

البـرق لعيـون المولـع منـاديـب=والبيـد لقـدام الخـلاوي ركـايـب

وارواحنـا لهمـوم بقعـا معازيـب=ومعـزب الارواح قبـر ونصـايـب

سبحان من يخفي عن العالم الغيـب=وخلا الوعد من نازع الروح غايـب

كلً يسوق الرجل ويـروح ويجيـب=احدً يجيـك بسلـم واحـدً نهايـب

واحدً يجيب الفود والعـز والطيـب=واحدً يذلـه كـل مـا كـان جايـب

من لا ستر وجهه عن الذل والعيـب=ما عاد يلقى لـذل وجهـه طبايـب

ومن لا حمى وجهه قبل طلعت الشيب=محدن يعوظه وجه لا صـار شايـب

ولا صار ذكرك فوق روس المراقيب=خلك على دربك ترى الدرب صايـب

تصير بعيون النشامـا كمـا الذيـب=وفعيون عدوانك عطيـب الظرايـب

موت الفتى با المرهفات المحاديـب=اخير من حيً مـع النـاس خايـب

موتً تباكـا لـه عيـون الاجانيـب=ولا عيشتً تدعي عليهـا القرايـب

ولي نفوسً مـا تـروم المواجيـب=ولـي يدينـن مـا تسـد النوايـب

عذر الردي ما كل من يجهد مصيـب=عـود الحماطـة كاسرتـه الهبايـب

ما يخلف الهقوه طـوال الاشانيـب=صحيح من قـال المراجـل وهايـب

يربا على الشاهوق عكف المخاليـب=ولا الوطـا يربـاه بـوم الخرايـب

من خالط العالم يشـوف التعاجيـب=ومن طاول الدنيا يشـوف الغرايـب

غير النبـي محـدً بليـا عذاريـب=وكلً على الثانـي سيولـه جذايـب

ليه؟ الحسد والغل والشـك والريـب=ليـه؟ القطيعـه وانـدلاع الحرايـب

يولـد الاحقـاد شـذب العراقـيـب=والغـل سـمً فـا المعاليـق ذايـب

شرارتً مـن ملحقيـن المشاهيـب=من ناشته خلـة ضلوعـه حطايـب

يومون با الامواس مثل القصاصيـب=ذنبً يوقـف منـه قطـر السحايـب

ياعل من يفرح بشيـل المشاعيـب=ويصير في فرقـا الرفاقـه سبايـب

تقطع عراويه من الرزق والصيـب=ويموت ما تنظـر عيونـه حبايـب

وتصف النفوس ويركـدً المشاريـب=لابه ذنب عقـرب ولابـه نشايـب

هذا بعـض مـا علمتنـا التجاريـب=اللـي مـن الايـام جتنـي جلايـب

لا كامل الا وجه مـن يعلـم الغيـب=ولا رابح الا اللي من الذنـب تايـب