الحــلم..للشاعر حامد زيد

وقت من البطا وفي ليله تتراقص شياطينه
بعد شفت الضيا ينزع من ثياب المسا الثلثين
تحايلت المنام اللي مثل بيتك تمرينه
وأنا اللي من تفارقنا ما غمضت لي عين
غريبة كل حلم يمر في رقادي تزورينه
والأغرب كيف احلم الحلم وارجع واحلمه بعدين
قبل يومين شفتك بالمنام وقمت من حينه
ونمت أمس ورجع نفس المنام اللي قبل يومين
إنا اللي قبل أسافر شلت قلبي من شرايينه
تركته في يدك مثل الامانه واحفظيها زين
ترى حفظ الامانه دين مجبورة تردينه
اجل مافي احد قالك حفظ الامانه دين
مرد الملقفي بيلفي ويوفي وتستوفينه
بعد ليله 10.4.3شهر شهرين
إذا ما أنت قد الكلام اللي تقولينه
حرام استأمنك حاجه وإذا جيت أطلبك تنسين
تخونين وتبين ارضي واحد يرضى تخونينه
أنا لجيت أخونك مع حبيبه ثانيه ترضين
من أول مارجعت من السفر ماشفتلك بينه
وان اللي كنت احسب قبل أدوس ارض المطار بتجين
تكونين أنت أول شخص عيني تحتضن عينه
وكنت أتخيلك من زود فرحت رجعتي تبكين
وأشوف بدمعتك حكي واعرفه قبل تحكين
وأجيب أحلى من اللي بتحكينه وأتركك تحكين
تقولين الوطن نور أقول بنور مضويه
تقولين غديت احلي وقاول عيونك الحلوين
كلام نام بشفاتك وخفتي لاتصحينه
ذخرتيه الغرام اللي ينام ويتركك تصحين
تغانمت غيابه لين رجحت موازينه
تعلم من يدك لمس الكفوف وعلمك تجفين
وليتك لاقيته به شي فيني ما تلاقينه
ماهو بغرور لكن خابرك مالك أمل تلقين
تغافلك بغلا وإلا لحلا ماهو من زينه
تزينه الصور والصحيح ابن الحلال زوين
وإنا ماني بناقص عنه يوم انك تبدينه
نصيبي هو نصيبي لو يسدده من الصوبين
قنوع بمظهري والسم مايذبح ثعابينه
على قول المثل ماني بحلو لكن ماني بشين
أذا أهداك الزهر مره فانا أهديتك بساتينه
وإذا إلهاك بفرح ليله أنا تهت لبكاك سنين
وإذا استضعفتك أملاكه وشتتك ملاينه
أنا حتى فتات الخبز اقسمها مع نصفين
طموحي بس أجي وأضفر بشي تستحقينه
تدينته تسلفته سرقته مو مهم منين
كأني من كثر ما راضى بلي تتمنينه
لو انك تطلبين الله يعنيني بالقول آمين
أنا ماالعب على الحبليين وقت الطيش وسنينه
تبيني الحين لما أني كبرت العب على الحبلين
ترى عند البدو بالذات عيب اللي تسوينه
حلاتك أذا عشقتني تعشقيني ليوم الدين
غرام نسكن ضلوعه حشميه من مجانينه
جفا يجمع معزتنا ولا عشق يذل اثنين
كثار اللي تحدوني وقالوا تحبينه
أمانه لا تخليني صغير بعيونهم تكفين
لأنهم كل ماقالو تخون أقول مسكينة
عليك الله أمانه علميهم من هو المسكين
أنا خايف أذا طاح الجمل تكثر سكاكينه
وانا ماعادت ضلوعي تحمل طعنه السكين
مثل ماقالو المكتوب واضح من عناوينه
لو ارحل منك للغربة بسافر من ظلامك وين
كفاية كل حلم يمر برقادي تزورينه
وكفاية من تفارقنا وانا ماغمضت لي عين
قبل يومين شفتك بالمنام وقمت من حينه
ونمت أمس ورجع نفس المنام اللي قبل يومين



(*( وسلامتكم جميعا )*)