قصائد الشاعر محمد بن خلف العجيمي

لا تلتفت كل من حولك رماد = تنعرف هالنار من شبابها
الوفا مبداي والعلم الوكاد = إن لي نفس ٍتعز أحبابها
شوقها يآصل على جفو البعاد = من عطاها تزهد بجلبابها
ساقها صدق الرضا حتى العناد = كذبةٍ تشفق على كذابها
الحزن جرح كسا لب الفؤاد = والأمل ضي ٍ بزغ من نابها
والدفا قلبٍ نسا حضن الوداد = كم تجرعت الأسى بغيابها
من يحسب الهم يشويه الرقاد = لو غفت عينك بلتك أطيابها
طيبتي غلطه زمن عثرة جواد = طيبتي شفت العما بأسبابها
البشر يا كثرهم مثل الجراد = ما تفرق حرها من وغرابها
الجماد الحي والحي الجماد = والمراجل نوخت بركابها
والبياض أصبح على دروبك سواد = النعم للي ينوش أترابها
من يسوم أغلا المشاعر بالمزاد = والأماني من ترقس بابها
ياصبر ما للصبر غير الحداد = وش بلا الدنيا وش اللي صابها
نم ولو عينك يغطيها السهاد = لكن أصحى لا تخون إلا بها
الحياة آمال وآفاق وجهاد = من عرف قدر الشقا ما هابها


000000000000000000

ليه أراضي دمعتك وأزعل فؤادي = ومن عرفتك بالمحبه وأنت ضدي
ليه أحس بدرب ما حس بمرادي = وشاطئ أفراحه ألم جزري ومدي
للمطر وادي وضيقاتي بوادي = مشكلة ثوب الونس ماهوب قدي
كنت أقول إن الغصن له كف شادي = وأطلق حجاجي وأبيحله بسدي
وأصدق النيه وعمر الحب غادي = والوفا ظلي وأخاف إنه يهدي
يالوفا إن مت بأعلن بك حدادي = لو توفت دمعتي من عقب جدي
رح سحابة طيف يا غفوة سهادي = لو أخذك المركب اللي ما يودي
تحسب إن ذبح الكرامه شي عادي = والغرور أعماك عن شيءٍ بودي
شف عطر ممساك خيم في ودادي = يا جروح الأمس من هالراس عدي
غلطتي كذبك وهو ملحي وزادي = أيه أحبك لكن أرفضك بتحدي
دمعتك ضحكة تمناها فؤادي = ودي أسعدها ولكن ما بيدي

00000000000000000000

يا مشتكي محدٍ من الناس معطيك = خذ بالنصيحه وأعتبرها وصيه
عليك بإحساس ٍ تحبه ويرضيك = وتلقى هناك برشفتين هنيه
لا تصير ضو ٍ تحرق اللي يدفيك = ولا زمهرير ٍ يكره الخو خيه
صبرك وجع مشراق وأدري يعنيك = ريح توجد للغصون الطريه
والذكريات اللي بزعمك تصحيك = تموت لوهي بأرض الأشواق حيه
إن جاد فرقا أو حدنه لياليك = خلك على ما قيل شمس إضحويه
حبيت وإن حبيت ما ودي أخفيك = ياكم تغنت بي طعون ٍ خفيه
مرت وشفت الخير بعيونها ذيك = خطٍٍ عرفت أقراه ونه وكيه
إن جيتها بالود لذة مشاهيك = وإن جيتها بالزين قمرًا شهيه
تعطيك ضي الدرب لو كان معميك = وإلا المشاعر لو تشوف معميه
يا حظ لو جيتك على شان أوريك = لوحة غلاي اللي بغلاي محميه
أرضيتها من قلب وأزعلت مرضيك = يا حظ ما ترحم وأقول أنت ليه
الله بلاني فيك يا فرحتي فيك = واللي بلاني فيك يبلاك فيه