الشاعر محمد البراق

لو كل من يبكي يحصل مراده = والله لتلقا كل الاجناس يبكون
مير البكا للي عليه القراده = الله يعين اللي من الوقت مغبون
أحدن همومه بالحياه السعاده= وأحدن همومه بالعمر كثرت ديون _
وأحدن ينام وحط دونه وساده= وأحدن شكا ليله على خالق الكون _
وأحدن شكا هجر الوليف وبعاده = وأحدن حفظ حبه عن اللي يعذلون _
واحدن سهر ليله صلاه وعباده = واحدن سهر مابين خمرا ومزيون _
دنيا بها العالم بياض وسواده = فيها عجايب تجعل الرجل مجنون _
الحر لامنه بغا شي صاده = والناس لامنهم بغو شي يسعون _
لاصار مالك في حياتك شهاده = منته مع العالم معزز ومصيون _
الله يوفقنا بقوة أراده = وأرقا مع اللي للمراقيب يرقون _
شفنا بدنيانا دروع وسناده = وشفنا بدنيانا ربوعن يصدون __
من تجربة عشر سنوات وزياده = شفت العجب والهم والشوق والهون _
العمر توه جعل يبقا مداده = مال العمر ياسامع الصوت قانون _
أعكس دروب الغير تلقا أفاده = تعرف تفرق بين الأشكال واللون _
الحب لامنه خذا القلب ناده = وأخذه ترا العشاق دايم يخونون _
مانطرد المقفي ونذخر شراده =الطيب فينا يالمقفين مخزون _
الحر لامنه تباطا هداده = قسمه مع الاحرار ماهو بمضمون_
أحيان ودك في زمانك إعاده =وأحيان ترضا بالقدر وانت محزون _
أتولع الجمره وتصبح رماد= والناس لو تعيش لازم يموتون _
يكفيك من هرجي وقافي وكاده = بيتن من الهاجس مقفا وموزون
الحر لامنه بغا شي صاده = والناس لامنهم بغو شي يسعون[/color]